Sudani yareze Leta Zunze Ubumwe z’Abarabu jenoside imbere y’Urukiko Mpuzamahanga

Sudani yashyikirije Urukiko Mpuzamahanga rw’Ubutabera (ICJ) i La Haye ikirego ishinja Leta Zunze Ubumwe z’Abarabu (UAE) kugira uruhare muri jenoside. Mu cyifuzo cyatanzwe ku wa Kane, tariki 6 Werurwe 2025, Khartoum isaba urukiko gufata ingamba zihutirwa zo guhagarika inkunga y’imitwe yitwara gisirikare.

Sudani isaba abacamanza gutegeka Abu Dhabi guhagarika ubufasha butangwa ku mutwe wa Rapid Support Forces (RSF), uyobowe na Gen. Mohamed Hamdan Dagalo, uzwi nka Hemedti.

Nk’uko byatangajwe n’umunyamakuru wa RFI i La Haye, Stéphanie Maupas, Sudani ivuga ko jenoside yabaye cyane cyane ku Banyasudani bo mu bwoko bwa Massalit, kuva aho intambara itangiriye mu 2023.

Khartoum ishimangira ko UAE yagize uruhare muri ibi bikorwa binyuze mu gutanga inkunga ya politiki, imari n’igisirikare ku mutwe wa RSF.