Rayon Sports yungutse abafatanyabikorwa babiri
Umuryango w’ikipe ya Rayon Sports wasinyanye amasezerano y’umwaka umwe na IGIHOZO GUEST HOUSE wo gukorana n’ikipe y’abagore ni mu gihe kandi yanasinyanye amasezerano na Kwesa Collection.
Muri aya masezerano harimo ko ikipe ya Rayon Sports y’icyiciro cy’abagore izajya yambara imyenda iriho ibirango bya IGIHOZO GUEST HOUSE munsi ya nimero inyuma mu mugongo.
Iyi kipe kandi izajya ibasha kuba yakorera umwiherero wa nyuma mbere y’iminsi ibiri kugira ngo ikine umukino runaka.
Rayon Sports kandi yasinye amasezerano y’ubufatanye na Kwesa Collection akubiyemo gufungura ku mugaragaro iduka rya Rayon Sports rizacuruza ibikoresho bitandukanye bifite ibirango bya Gikundiro.
GIKUNDIRO SHOP izafungura mu minsi ya vuba nk’uko Rayon Sports babitangaje mu gusinya ayo masezerano.
Mu kiganiro n’abanyamakuru nyuma y’aho,Perezida wa Rayon Sports, Uwayezu Jean Fidèle yahamije ko saa munani z’ijoro ry’uyu wa Kane tariki 23.11.2023, iyi kipe yakira rutahizamu ukomeye cyane uza gufasha abahasanzwe mu rugamba rwo guharanira gutwara ibikombe iyi kipe izitabira byose.
