Perezida Tshisekedi yavuze ku byo kugirana imishyikirano na M23

Perezida Félix Antoine Tshisekedi wa Repubulika Iharanira Demokarasi ya Congo, yatangaje ko igihugu cye kitazigera kiganira n’umutwe wa M23. Yabitangaje ku wa Gatandatu, ubwo yari i Kinshasa mu nama n’abahagarariye ibihugu bitandukanye, aho yemeje ko kuganira n’uyu mutwe, yise uw’iterabwoba, ari umurongo muto igihugu cye kitazarenza.

Tshisekedi yavuze ko Repubulika Iharanira Demokarasi ya Congo itazemera igitutu cy’amahanga gisaba ko igirana ibiganiro na M23. Yashimangiye ko kwinjira mu mishyikirano n’uwo mutwe byaba bihabanye n’inyungu n’ubusugire bw’igihugu cye.

Yagize ati: “Repubulika Iharanira Demokarasi ya Congo ntizemera guhatirwa n’amabwiriza y’amahanga anyuranyije n’ibyo dushaka ndetse n’ubusugire bwacu. Kuganira n’umutwe w’iterabwoba nka M23 ntabwo bizigera biba igishoboka kuri twe.”

Yongeyeho ko gusubiza icyubahiro abagizweho ingaruka n’ibikorwa bya M23 bisaba kwirinda ibiganiro n’uyu mutwe, kuko byaba ari ukwima agaciro ibikomere byabo. Ni mu gihe ibihugu bimwe, birimo Leta Zunze Ubumwe za Amerika, byari biherutse gusaba ko hakorwa ibiganiro hagati ya RDC na M23 mu rwego rwo gushakira amahoro uburasirazuba bw’iki gihugu.

Tshisekedi yasubiyemo ko RDC izakomeza guhakana ibiganiro n’uyu mutwe, akemeza ko ari icyemezo kidashobora guhinduka.