Dr. Jose Chameleone yerekanye urukundo akunda Uganda, asaba ubumwe hagati ya Alien Skin na Pallaso

Mu bihe bitoroshye by’uburwayi, umuhanzi w’icyamamare muri Uganda, Dr. Jose Chameleone, yongeye gushimangira urukundo afitiye igihugu cye.

Nubwo ari mu bihe bigoye byo kwivuza, Chameleone yakomeje kwerekana ko afite umutima w’impuhwe no gukunda amahoro, asaba ko abahanzi bagenzi be, Alien Skin na Pallaso, bahuzwa mu bikorwa by’ubumwe n’amahoro.

Nk’umwe mu bahanzi bafite izina rikomeye mu karere, Chameleone yavuze ko ari ingenzi gushyira imbere ubumwe mu rugendo rwa muzika muri Uganda. Yagaragaje ko ibikorwa byo guteza imbere umuziki bidakwiye kubamo amakimbirane, ahubwo byakabaye intambwe yo kubaka igihugu no guhuriza hamwe urubyiruko rw’abahanzi.

Kuba yagaragaje ubu butumwa byaje mu gihe abahanzi Pallaso, murumuna wa Chameleone, na Alien Skin bari bamaze igihe bagaragaza kutumvikana mu buryo butandukanye. Ibi bikomeje kuganirwaho cyane muri Uganda, by’umwihariko mu bakunzi b’umuziki wabo.

Mu butumwa bwuje urukundo, Chameleone yavuze ko kwishyira hamwe bizafasha gukemura amakimbirane no guteza imbere impano z’abahanzi b’Abanya-Uganda, bityo bagatanga ishusho nziza ku ruhando mpuzamahanga.

Kugeza ubu, abakurikiranira hafi iby’iyi nkuru bategereje kureba niba ubutumwa bwa Chameleone bwabyazwa umusaruro, maze hakaboneka ihuriro ry’amahoro hagati ya Alien Skin na Pallaso.