Safi Madiba yavuze ku itandukana rye na Urban Boys no ku rugendo rwe nk’umuhanzi wigenga

Umuhanzi Niyibikora Safi, uzwi cyane nka Safi Madiba, yavuze ko itandukana rye na Urban Boys ryaturutse ku nzozi zitandukanye buri wese yari afite mu itsinda.

Yavuze ko iki kibazo ari cyo cyatumye afata icyemezo cyo gutangira urugendo rwe nk’umuhanzi ku giti cye.

Safi Madiba, kuri ubu utuye mu Mujyi wa Vancouver muri Canada, amaze iminsi akora ibitaramo mu bihugu bitandukanye nka Leta Zunze Ubumwe za Amerika, u Bufaransa, ndetse ari kwitegura gutaramira mu Rwanda.

Yavuze ko Urban Boys ifite umwanya wihariye mu rugendo rwe rw’umuziki kuko ari ho yatangiriye, bakabasha gukora indirimbo zikundwa cyane, ndetse itsinda rikagira ibihe byiza byaranatumye begukana amarushanwa akomeye nka Primus Guma Guma Super Stars.

Yagarutse ku buryo yinjiriye mu muziki, aho yavuze ko mbere yo kwinjira muri Urban Boys yari yaragerageje gushaka akazi mu maduka nka Simba Supermarket na Nakumatt ariko ntibimuhire.

Nyuma yo kwinjira mu itsinda, we na bagenzi be bashoboye gukora umuziki mwiza kugeza igihe buri wese yagize indoto zitandukanye.

“Iyo ukora nk’itsinda mukorana imbaraga, ariko igihe kiragera buri wese agira inzozi zitandukanye. Icyo gihe byasabye ko twitandukanya kugira ngo buri umwe ashyire mu bikorwa ibyo yifuzaga,” Safi Madiba yasobanuye.

Urban Boys yari igizwe na Safi Madiba, Nizzo, na Humble Jizzo, ariko kuri ubu buri wese ari gukorera umuziki mu buryo bwe.

Nizzo asigaye mu Rwanda, mu gihe Humble Jizzo yibera muri Kenya n’umuryango we.