Perezida Embalo yasheshe inteko ishinga amategeko nyuma yo kwikanga Coup d’état

Perezida Umaro Sissoco Embalo wa Guinée Bissau, yasheshe inteko ishinga amategeko y’icyo gihugu nyuma yo kwikanga Coup d’état.

Kuri uyu wa Mbere tariki ya 4 Ugushyingo 2023 ni bwo Perezida Embalo yasohoye iteka risesa inteko ishinga amategeko ya Guinée-Bissau.

Ni nyuma y’uko mu cyumweru gishize i Bissau mu murwa mukuru habaye irasana.

Iteka rya Perezida Embalo rivuga ko kurasana kwabayeho ari “umugambi wo guhirika ubutegetsi waje kuburizwamo.”

Mu ijoro ryo ku wa Kane w’icyumweru gishize ni bwo i Bissau habereye imirwano yasakiranyije abasirikare bo mu mutwe ushinzwe kurinda Perezida Embalo na bagenzi babo bo mu yindi mitwe, nyuma y’uko abashinzwe umutekano bari barekuye Abaminisitiri babiri batavuga rumwe n’ubutegetsi bari bari bafunzwe bakurikiranyweho ruswa.

Iteka rya Embalo rivuga ko “itariki y’amatora y’Abadepite ataha azashyirwaho hakurikijwe ibiteganywa n’Itegeko Nshinga.”

Si ubwa mbere inteko ishinga amategeko ya Guinée-Bissau iseswa kuko mu mwaka ushize na bwo Perezida Embalo yayisheshe, nyuma yo gushinja abadepite bari bayigize ibyaha bya ruswa.